Fotoen aus dem Buch - Am Minett gescht an haut"
D'Péitenger Gare ass den 1.8.1872 zesumme mat der Streck Esch-Uelzecht-Péiteng, déi vun der Compagnie des chemins de fer Prince-Henri exploitéiert gouf, a Betriib gaangen. Dat éischt Gebai aus Holz un engem Quai vun 30m ass 1876 gebaut ginn. An dësem Gebai vun 12x6m hat och de Chef de Gare seng Wunneng. 1900 ass déi al Gare duerch en neit Gebai aus Steen ersat ginn. Ob et sech bei dem ale Gebai ëm genau dat handelt, wat een op der Postkaart gesäit ass schwéier ze soen. Et schéngt zumindest net ganz aus Holz gebaut gewiescht ze sinn. Dat neit Gebai ass also de 6.9.1900 a Betriib gaangen, d.h. zu deem Moment wéi d'Foto gemaach gouf. D'Péitenger Gare war och Sëtz vum Exploitant vun der Linn, de Prinz-Heinrich Bahnen, wouduerch de Site ëmmer méi wichteg gouf an divers Atelieren an aner technesch Ariichtunen am Laf vun der Zäit dobäi koumen. Zweemol gouf d'Gare Affer vun engem Brand, fir d'läscht 1981, wéi d'Atelieren beschiedegt goufen. Den ënnerierdesche Passage ënnert de Gleiser gouf 1983 gebaut. Um Enn vun den 1990er Joeren gouf mat enger gréisserer Renovatioun an Extensioun vun der Gare ugefaangen, déi 2000 ofgeschloss gouf.
Postkaart vun 1900. Fotograf & Editeur: Jacques Marie Bellwald, Echternach.
Där huet aal Fotoen oder soss eppes zu deser Seit beizedroen, kee Problem,
kontakteiert eis iwert Rubrik Kontakt.
Wann Där net wëllt, datt eng vun ären Fotoen hei publizeiert gëtt,
da kontaktéiert eis w.e.g. a mär huelen se sou séier wéi méiglech erof.
Et ass net erlaabt Fotoe vun eiser Websäit ze kopéieren an/oder op anere Plazen ze publizéieren
ausser daer hut mat eis en Ofkommes gemach.
copyright (c) geschichtsfrënn vun der gemeng péiteng & claude arend